Nëntori i vitit të kaluar ishte moment trishtimi për Kolegjin Heimerer, pasi njëri prej bashkëthemeluesve të këtij Institucioni ndërroi jetë si pasojë e plagëve të marra në një aksident fatal.

Andaj, fundviti nuk ishte i zakonshëm. Për herë të parë, stafi i Kolegjit nuk mori mesazhin e urimit nga z. Frieddrich Heimerer, i cili çdo vit kujdesej që ta përçonte tek të gjithë kolegët e Kolegjit mesazhin e përkrahjes dhe rrugës drejt zhvillimeve edhe më të mëdha.

Sot Kolegji kujtoi përmes një Mbledhjeje Komemorative jetën dhe veprën e një njeriu që jetën e tij e ndërtoi mbi vlerat e paqes, punës, dijes dhe përgjegjësisë ndaj të tjerëve.

Në këtë ceremoni komemorative mori pjesë edhe djali i tij, Adrian Heimerer, i cili vizitoi edhe hapësirat e Kolegjit. Po ashtu në këtë ceremoni morën pjesë edhe partnerë nga Gjermania dhe India, profesorë, ligjërues, e studentë nga Kolegji.

Me këtë rast u shfaq edhe një dokumentar i përgatitur nga Kolegji për jetën dhe veprën e z. Friedrich Heimerer, ku u paraqit rrugëtimi i tij qysh prej lindjes në vitin 1949 e deri në nëntorin e vitit që lamë pas.

Për ta nderuar kujtimin për të, kjo ceremoni u mbyll me dy pika nga vajzat e Grupit Okarina, Fjollë Koxha dhe Hana Hana në violinë.