Teknik Laboratori

180 KREDI ECTS
Të diplomuarit e ketij programi punojnë në një ekip me specialistë të profesioneve laboratorike, mjekë specialistë të fushave klinike, infermierë dhe profesionist tjerë të shëndetit, si pjesë e sistemit ku pacienti eshte në qendër.

PROGRAMI
Zhvillimi i diagnostikës mjekësore laboratorike është një nga segmentet e mjekësisë moderne. Sot është pothuajse e pamundur të punohet pa një ekip, në të cilin njëra nga hallkat është edhe mjekësia laboratorike, si një pikënisje për zbulimin e sëmundjeve, trajtimin e tyre dhe mjekimin e pacientëve. Diagnostika mjekësore laboratorike, është një fushë shkencore, që lidhet me funksionimin e laboratoreve klinike, me qëllim të diagnostikimit, trajtimit dhe parandalimit të sëmundjeve. Ajo është e bazuar në parimet e biologjisë qelizore dhe molekulare që mundësojnë të kuptuarit e funksioneve normale dhe patologjike të trupit të njeriut. Gjithashtu është një pikënisje për vendosjen e diagnozave nga më të thjeshta, deri tek ato më komplekse.

Pas përfundimit të studimeve, Bachelor-i profesional në diagnostikën mjekësore laboratorike, fiton njohuri dhe shkathtësi për të kryer të gjitha llojet e diagnostikës laboratorike. Bachelor-i profesional në diagnostikën mjekësore laboratorike, është ekspert i kualifikuar me njohuri të gjera dhe aftësi me një nivel të lartë, jo vetëm për mbledhjen, përpunimin dhe analizimin e mostrave biologjike (lëngje organike dhe inde), por edhe për të kuptuarit e procedurave komplekse laboratorike, mbledhjen e të dhënave, zgjidhjen e problemeve, zbatimin e kontrollit të cilësisë, zhvillimin dhe aplikimin e metodave dhe procedurave që lidhen drejtpërdrejt me diagnostikën laboratorike. Stafi i laboranteve punon në një ekip me specialistë të profesioneve laboratorike, mjekë specialist të fushave klinike, infermierë dhe profesionist tjerë të shëndetit si pjesë e sistemit me pacientin në qendër.